Lajm tronditës: Klubi ka finalizuar largimin e tre lojtarëve për shkak të… lexoni më shumë.
Kampionati ‘Abissnet Superiore’ ka përfunduar dy fazat e para, duke dhuruar ndeshje emocionuese dhe shpesh rezultate surprizë. Në përfundim të javës së 18-të, kemi tashmë një kryesues të ri, Dinamo City. Ekipi, i drejtuar nga Ilir Daja, po shkëlqen në kampionat, duke kryesuar me 31 pikë. Gjatë fazës së dytë, Dinamo ka pësuar vetëm një humbje, kundër Partizanit.
Pas fazës së parë, Partizani kryesonte kampionatin me 16 pikë, ndërsa Dinamo City ndodhej në vendin e tretë me 15 pikë.
Me të njëjtën sasi pikësh si Dinamo në vendin e parë është Vllaznia, e cila renditet e dyta për shkak të disavantazhit në ndeshjet direkte, ku është mundur dy herë nga Dinamo.
Ekipi, i drejtuar nga Thomas Brdarić, ka qenë më i suksesshmi gjatë fazës së dytë, duke grumbulluar 17 pikë, më shumë se çdo ekip tjetër në ‘Abissnet Superiore.’ Nga vendi i pestë në fazën e parë, Vllaznia tashmë renditet në vendin e dytë, plotësisht e merituar.
Këtë fundjavë do të fillojë faza e tretë e kampionatit dhe do të zhvillohet java e fundit e ndeshjeve për këtë vit. Mbetet për t’u parë se si do të ecin ekipet dhe çfarë ndryshimesh do të ndodhin në renditje.
